موسى موسى . ربنا امر بالسترة

موسى موسى

قلنا سابقا …
لبيحب يعمل نائب مسلم سني بعكار بدو يصرف فوق الخمسة ملايين دولار
وهلئ هخبركن ليش …وليش سقطت كل الزعامات والشعارات وصارت النيابة لاصحاب الدولارات
لانو سبعين بالمية من اصوات الاسلام بدها مصاري لتنتخب هيك عالمكشوف
ولانوا الناخب المسلم ما بدو النائب للخدمات وقاطع الامل من اية خدمة عبر الاسلام لا وبيعتقد انوا المسيحي بيخدم اكتر من المسلم

فصار يقول شو بقدر طلع بهالفرصة او هالموسم الانتخابي بيكون منيح
وعهالاساس صار يبرم الناخب المسلم عالمرشحين ويدبر حالوا بما استطاع
وعهالاساس خلقت مفاتيح انتخابية عشكل سماسرة لتدبير بيع الاصوات …. وطول بالك هخبرك بالسياق ادناه انا شو عملت ووين كنت واديش طلعت مصاري
طيب
عند المسيحية ما في هالحكي الناخب المسيحي انضج من الناخب المسلم بعكار واريح بالحالة المادية واذا بدو ياخد مصاري فسعروا اغلى بكتير من صوت المسلم
وعليه
لا يمكن نلاقي مسيحي عمينتخب مسلم ولو بالمصاري
ليش لانوا معظم المسيحين متحزبين ومنظمين امورن بانتماء سياسي ولمسنا ناخبا مسلما ينتخب مرشح مسيحي ببلاش بينما القليل من الاسلام انتخب مرشحا مسلما ببلاش ولو كان من عضام الرقبة للمرشح وعندي وثائق …
ونجد
كتير مسلمين غير منظمين وبيعتبروا انو الاحزاب شي مو منيح
واذا لقينا الناخب بحزب مسلم يعني حزب مسلم سني يعني لازم المرشح يدفع للقيادة الحزبية وهيي بتدفع لجماعتها يعني رجعنا عالدفع المنظم
طيب
هادي الحالة اوالعرف الانتخابي عند الاسلام بعكار سببها وهقولها عالمكشوف … مين …
( تيار المستقبل )
يعني حزب الاسلام السنية
اه المستقبل علم الاسلام ينتخبوا بمصاري وعمل مركزية للدفع من بيروت للناخب بعكار
يعني الشباب المقربين من دولة الرئيس الحريري بدن يقبضوا ليركبوا المرشح بلائحة الحريري وهادا ليس سرا
وبعدين يقوم المرشح بدفع حق الاصوات للمنسقيات بدائرة ترشحيوا وهيك صار سابقا
طيب
اليوم دولة الرئيس سعد الحريري انسحب وانسحب كتير اوادم ومخلصين وصادقين معوا
بس كمان تاجر وسمسر كتير من كوادر المستقبل بالانتخابات يعني لقينا قسم من المستقبل عالارض عميشتغل وطلع اسم الشيخ احمد الحريري بكتير مطارح وخاصة باطار تركيب اللوائح
عكل حال مو هادا حديثنا
انما حديثنا عن الناخب المسلم لبدو مصاري لينتخب وقلنا انو المستقبل عودوه هيك
وعليه لو مترشح تلاتي من وادي خالد بحجم رصيد النائبين الحاليين المالي كانوا ربحوا تلت نواب اسلام سنة من الوادي ليش لانن بيدفعوا وبيصرفوا ليربحوا مو ليجربوا
والف مبروك الله يحسن التوفيق … لحقوهن

وللبيان كل المرشحين دفعوا مصاري ولا بد من تلاتين بالمية هدر بالمصاريف لازم يضحي فيهن المرشح
وللبيان بدك تعرف انا موسى موسى شو عملت .
اه هخبرك عالمكشوف
كنت مع الحج علي طليس وباقي معوا
وقبضت ودفعت بشكل منظم جدا ومدروس ومكتوب متل اي مدبر انتخابي ناجح
وصرت بعرف كل واحد اديش حقوا وبعرف كل شي كل شي كل شي
ولبيحب يفهم اكتر يحكيني
لبينلوا انو هناك ناس كبار يصعب شراؤهم وثمنهم كلمتهم وموقفهم
وهناك ناس كذابين ملعبين نطناطين نسيوا كل خدمة اخدوها سابقا وصاروا بدن هلئ مصاري لينتخبوا …
وتركوني لاني ما دفعت او ما معي ادفع ونسيوا كل خدمة اخدوها من الحج طليس … وباعوا صوتن
طبعا كان معي مصاري ولو صابرين وصامدين وعاملين موقف كانوا قبضوا
بس كان امتحان والامتحان نهار
وللبيان تردد ان غسان بيك المرعبي لم يعلم بترشيح وسيم المرعبي باسم الجامعة المرعبية وان ترشيح الاستاذ وسيم جاء من طبخة داخلية بقلب الجامعة المرعبية لغاية لن اذكرها ولو علم البيك الكبير بترشيح اخونا وسيم لكان صرف عليه ما يجعله ينجح كما قالوا لاحقا …
وللبيان استمرت الجامعة المرعبية بتقديم خدماتها كما قبل الانتخابات
وللبيان واصل علي طليس تقديم خدماته كما كان قبل الانتخابات … وبس
وللبيان طلع الدكتور سامر حدارة وحدوا باصوات اكتر من الجامعة المرعبية … ( لطشة)
وللبيان انو ليش عمبذكر الجامعة المرعبية
لانوا ضيعتي برقايل تشكل ملعبهم وبعرف كل التفاصيل اه كل التفاصيل وسبقناهن فيها باصوات طليس
يعني انا وفريقي من غير الدخلاء علينا سبقنا فريق الجامعة المرعبية بالضيعة
انا وفريقي بس
ليش
لانوا بدي جاكر لحاقدين عليي وحاملين حملتي
ولانوا هادا انا هيك
وبدي خبرن انو سامر حدارة وحدوا سبق الجامعة المرعبية بعكار
وللبيان هادا الحكي من راسي
وللبيان عندي اسماء ومعلومات بتجرص اصحاب اللسانات الطويلة من الصغير للكبير وحتى بزواريب ضيعتنا وقت بدك بنبشلك كل خدمة تشاطرت باخدها من الحج طليس بالوقت واليوم والقيمة ويوم الانتخاب صار بدك مصاري
وغيرك اخد مصار ي وانتخب غير مطرح …الخ
بس ربنا امر بالسترة

فيا ايها الناخب المسلم اليوم لا تجد من يخدمك بالكهربا بس
ويا من تحب ان تترشح عليك ان تتحضر لمعركة مفتوحة بدفع المصاري
يعني بدك تصرف فوق الخمسة ملايين دولار بتعمل نايب

عن Moussa Moussa

شاهد أيضاً

طليس : هدفنا العمل والانتاج

اعلن المرشح عن المقعد السني في عكار الحاج علي طليس ان نيتنا حمل الامانة بكل …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *